Kryetari i Komunës së Vitisë, Sokol Haliti, është pritur në një takim zyrtar nga homologu i tij, Olaf Hausmann, në Kirchhain, në kuadër të bashkëpunimit të vazhdueshëm ndërmjet dy komunave të binjakëzuar.
Takimi u zhvillua në një atmosferë miqësore, duke reflektuar marrëdhëniet e konsoliduara që Vitia dhe Kirchhain kanë ndërtuar ndër vite përmes partneritetit të qëndrueshëm dhe projekteve të përbashkëta.
Gjatë bisedimeve, kryetari Haliti shprehu mirënjohje për mikpritjen dhe përkrahjen e vazhdueshme, duke theksuar rëndësinë e thellimit të bashkëpunimit në fusha konkrete. Ai gjithashtu e ftoi kryetarin Hausmann për një vizitë zyrtare në Viti, me synim forcimin e lidhjeve dhe shkëmbimin e përvojave ndërinstitucionale.
Në fokus të diskutimeve ishte edhe bashkëpunimi në projektin për menaxhimin e mbeturinave organike, si dhe iniciativa të tjera zhvillimore, për të cilat palët synojnë të sigurojnë mbështetje nga fondet ndërkombëtare, përfshirë Fondacionin Gjerman për Mjedis.
Ky takim konsiderohet si një tjetër hap drejt avancimit të partneritetit ndërmjet dy komunave, me theks të veçantë në mbrojtjen e mjedisit dhe zhvillimin e qëndrueshëm. /Gjilani INFO/
