Punimet për përmirësimin e infrastrukturës rrugore në fshatin Topanicë po vazhdojnë me intensitet. Kryetari i Komunës së Kamenicës, Kadri Rahimaj, së bashku me nënkryetaren Arta Bajralia, drejtorin e Drejtorisë së Investimeve Kapitale, Blerim Morina, si dhe zyrtarin nga kjo drejtori, Imran Morina, kanë vizituar nga afër punimet për asfaltimin e rrugëve në këtë fshat.
Gjatë vizitës, kryetari Rahimaj theksoi rëndësinë e këtyre investimeve për përmirësimin e infrastrukturës rrugore dhe lehtësimin e qarkullimit për banorët e Topanicës.
Ai bëri të ditur se aktualisht po punohet në asfaltimin e 15 rrugëve lokale, ndërsa edhe gjashtë rrugë të tjera pritet të fillojnë së shpejti.
“Në kuadër të punimeve që do të realizohen është edhe ndërtimi i trotuarit, i cili fillon nga shkolla e deri në pjesën e epërme të fshatit. Ashtu siç kemi thënë, ky mandat do të karakterizohet me një dinamikë tjetër pune”, ka thënë Rahimaj.
Sipas tij, këto investime kanë për qëllim përmirësimin e infrastrukturës lokale dhe krijimin e kushteve më të mira për banorët e fshatit Topanicë./Gjilani INFO/
