Fëmijët e Institucionit Parashkollor “Filizat”, së bashku me drejtoreshën Fatime Leci dhe mësueset e tyre, sot vizituan Komunën e Kamenicës me rastin e 18-vjetorit të Pavarësisë së Republikës së Kosovës.
Ata u pritën në sallën e Kuvendit Komunal, nga Kryetari Kadri Rahimaj, Nënkryetarja Arta Bajralija, Drejtoresha e Administratës, Arlinda Sejdiu dhe Drejtori i Arsimit, Selami Klaiqi.
“Jam shumë i lumtur që në përvjetorin e pavarësisë keni ardhur në objektin e komunës sonë. Ky objekt është si shtëpia juaj, por më i madh. Ne këtu punojmë bashkë me prindërit tuaj dhe përkujdesemi për qytetin dhe fshatrat ku ju jetoni. Kur kam qenë fëmijë gjithmonë pyesja kush na ndihmon ta bëjmë jetën më të mirë. Ta dini se komuna na ndihmon për këto gjëra që qyteti të jetë më i pastër, të ketë rrugë e trotuare të rregulluara, shkolla të mira, lodra e parqe dhe sa më shumë pastërti”, tha Kryetari Rahimaj.
Ndër të tjera Kryetari Rahimaj u shpërndau të gjithë fëmijëve nga një certifikatë duke u thënë se me këtë rast ata janë “kryetarët e vegjël”.
“Ju jeni e ardhmja jonë, për të cilën ne punojmë shumë. Sot të gjithë jeni kryetarët e vegjël. Sot Kamenica ka shumë kryetarë, andaj urime të gjithëve”, u shpreh Kryetari Rahimaj, i cili u duartrokit fort nga ato duar të vockla.
Fëmijët recituan poezi dhe kënduan këngë kushtuar Pavarësisë së Republikës së Kosovës, si dhe heronjve që dhanë jetën për lirinë./Gjilani INFO/
