Fakulteti i Shkencave Sociale në Universitetin Publik “Kadri Zeka” në Gjilan ka nënshkruar marrëveshje bashkëpunimi me Lidhjen Rajonale të Futbollit në Gjilan, me qëllim të krijimit të një kornize të përbashkët për zhvillimin e diplomacisë sportive si element i paradiplomacisë, edukimit joformal dhe përfshirjes aktive të studentëve në aktivitete praktike.
Kjo marrëveshje synon thellimin e bashkëpunimit në fusha me interes të përbashkët, duke përfshirë zhvillimin e paradiplomacisë si instrument i marrëdhënieve ndërkombëtare dhe diplomacisë publike, promovimin e imazhit pozitiv të Republikës së Kosovës përmes futbollit, si dhe ofrimin e trajnimeve profesionale dhe institucionale për aktorët e futbollit.
Nëpërmjet këtij bashkëpunimi, Fakulteti i Shkencave Sociale do të krijojë mundësi konkrete për përfshirjen e studentëve, veçanërisht të programit Marrëdhëniet Ndërkombëtare dhe Studimet Evropiane (MNSE), në projekte të përbashkëta, aktivitete edukative, organizime promovuese dhe angazhim praktik në sektorin sportiv, me fokus të veçantë në komunikimin publik, etikën sportive dhe sjelljen institucionale.
Gjatë takimit u theksua se sjellja institucionale, etika sportive dhe përfaqësimi dinjitoz i Kosovës në ngjarje sportive janë komponentë thelbësorë të diplomacisë sportive dhe kanë ndikim të drejtpërdrejtë në imazhin ndërkombëtar të vendit.
Fakulteti i Shkencave Sociale mbetet i përkushtuar në zgjerimin e partneriteteve me institucione sportive, arsimore dhe shoqërore, në funksion të zhvillimit akademik, profesional dhe komunitar, duke ofruar mundësi të reja për studentët dhe duke fuqizuar rolin e universitetit në shoqëri./Gjilani INFO/
