Universiteti Publik “Kadri Zeka” vazhdon të dëshmojë përkushtimin e tij ndaj ndërkombëtarizimit dhe rritjes së cilësisë akademike përmes zgjerimit të bashkëpunimeve ndërkombëtare dhe zhvillimit profesional të stafit.
Në këtë kuadër, Rektori i Universitetit Publik “Kadri Zeka”, Prof. Assoc. Dr. Artan Dërmaku, së bashku me Prorektorin për Bashkëpunim Ndërkombëtar dhe Projekte, Prof. Dr. Dukagjin Leka, si dhe profesoreshën e Gjuhës Angleze dhe njëherit menaxhere e projektit me Peace Corps, Prof. Assoc. Dr. Teuta Agaj, zhvilluan një takim me profesorin Dr. Sc. Paul Rutter.
Takimi u realizua në kuadër të projektit të bashkëpunimit ndërmjet Universitetit Publik “Kadri Zeka” dhe Peace Corps, përmes të cilit Dr. Sc. Paul Rutter do të angazhohet në Universitetin Publik “Kadri Zeka” si ligjërues dhe trajner. Ai do të mbajë trajnime gjuhësore në Gjuhën Angleze për stafin akademik dhe administrativ të universitetit.
Këto trajnime synojnë përmirësimin e kompetencave gjuhësore, rritjen e aftësive profesionale të stafit, si dhe forcimin e kapaciteteve institucionale për bashkëpunim ndërkombëtar dhe pjesëmarrje aktive në projekte akademike ndërkombëtare.
Angazhimi i Dr. Sc. Paul Rutter përfaqëson një hap të rëndësishëm drejt shkëmbimit të përvojave akademike dhe integrimit të praktikave më të mira ndërkombëtare në Universitetin Publik “Kadri Zeka”.
Universiteti Publik “Kadri Zeka” mbetet i përkushtuar në ndërtimin e partneriteteve të qëndrueshme ndërkombëtare, zhvillimin profesional të stafit dhe krijimin e një mjedisi akademik bashkëkohor, konkurrues dhe të hapur ndaj botës. /Gjilani INFO/
