Arbër Ismajli i Lidhjes Demokratike të Kosovës (LDK), i cili në zgjedhjet lokale synoi pozitën e kryetarit të Komunës së Gjilanit, tani do t’i hyjë një gare tjetër, garës për deputet dhe këtë e ka bërë me dije vet ai.
“Në këtë moment të rëndësishëm për fatin e drejtimit të vendit tonë, dua t’ju njoftoj se kam pranuar të jem kandidat për deputet në Kuvendin e Republikës së Kosovës nga radhët e Lidhjes Demokratike të Kosovës. Ky vendim ka ardhur nga një reflektim i thellë për përgjegjësinë që kemi ndaj qytetit tonë, rajonit dhe mbarë Republikës”, ka thënë Ismajli.
Ai ka shprehur mirënjohjen e tij për strukturat e LDK-së që i kanë besuar këtë detyrë, kryesinë, kryetarët e nëndegëve bashkë me strukturat e tyre. Një falënderim i veçantë ai ka edhe për kryetarin e Degës së Gjilanit, Lutfi Haziri, për mbështetjen dhe partneritetin e tij të vazhdueshëm, si dhe për kryetarin e LDK-së, Dr. Lumir Abdixhiku, për, siç ka thënë Ismajli: “vizionin e qartë dhe besimin që ka vendosur tek unë dhe tek gjenerata që vjen”.
“Jam shumë vetëdijshëm se kjo rrugë kërkon seriozitet, përkushtim dhe ndershmëri. Këto janë vlerat me të cilat kam punuar deri sot dhe me të cilat do të vazhdoj, pa asnjë kompromis. Qëllimi i kandidaturës sime është të përfaqësoj me dinjitet interesin e qytetarëve dhe të kontribuoj realisht në zhvillimin e Kosovës, në veçanti në fushat ku kam përvojë profesionale dhe përgjegjësi publike”, ka thënë tutje Arbër Ismajli i LDK-së.
Ai tha edhe se para nesh kemi një etapë që kërkon mobilizim, angazhim dhe bashkëpunim. Është fati i kthesës historike për Republikën tonë.
“Prandaj, i ftoj të gjithë qytetarët, familjarët, miqtë dhe bashkëpunëtorët e shumë viteve, të qëndrojmë të bashkuar për një proces të drejtë, të qetë dhe të përkushtuar, ashtu siç meriton vendi ynë. Besimin që ma keni dhënë deri sot e konsideroj obligim. Përkushtimi im ndaj jush do të jetë më i plotë dhe i pandarë”, ka thënë Arbër Ismajli i LDK-së, i cili do t’ hyjë garës për deputet në zgjedhjet e 28 dhjetorit. /Gjilani INFO/
