Ka nisur rrënimi i objekteve të vjetra në qendër të qytetit, për tu ndërtuar objekti i ri i administratës me rreth 9 mijë metra sipërfaqe.
Kjo po bëhet në kuadër të projektit më të madh kapital në historinë e Gjilanit, Bulevardin e qytetit, me investim prej 18 milionë euro, gurthemeli i së cilit u vë me 2 shtator të këtij viti.
Mandatin e dytë dhe që në ditën e parë, kryetari i Komunës së Gjilanit, Alban Hyseni e filloi me punimet në Bulevardin e qytetit.
Kryetari Hyseni, tha se dita e parë e mandatit të dytë nis me projektin e Bulevardit të qytetit.
“Rrënimi i objektit të administratës dhe i objekteve përcjellëse, pas vendimit të shumëpritur nga Instituti për Trashëgimi Kulturore, është moment historik për Gjilanin tonë”, tha Hyseni.
I pari i Gjilanit, theksoi se në këtë mandat, projektet që i ka nisur do të vazhdojnë me ritëm më të fuqishëm, e projektet e reja do ta bëjnë edhe më të bukur qytetin.
Ky bulevard do të ketë 450 metra gjatësi, rreth 30 mijë metra katror hapësirë publike, 500 parkingje nëntokësore si dhe objektin e ri të administratës komunale me sipërfaqe prej 8,700 metra katror./Gjilani INFO/
