Këshilli Prokurorial i Kosovës (KPK), nën udhëheqjen e Kryesuesit Ardian Hajdaraj, ka mbajtur sot takimin e 274-të me radhë.
Në këtë mbledhje, Këshilli ka marrë vendimet, si në vijim:
1. Miratoi rendin e ditës duke i hapur rrugë shqyrtimit të pikave të përcaktuara për diskutim dhe vendimmarrje.
2. Këshilli është njoftuar për vlerësimin paraprak mbi përfaqësimin shumetnik dhe gjinor në kuadër të procesit për zgjedhjen e anëtarit të ri prokuror të Këshillit, në përputhje me paragrafin 2 të nenit 5 të Rregullores nr. 05/2025 për Zgjedhjen e Anëtarëve Prokurorë të Këshillit Prokurorial të Kosovës. Ky vlerësim synon garantimin e respektimit të standardeve ligjore dhe të parimit të barazisë në përfaqësim.
3. Shpalli zgjedhjet për anëtarin e ri të Këshillit për plotësimin e një vendi nga radhët e prokurorëve të prokurorive themelore. Ky vend do të plotësohet nga një prokurore për përfaqësim të gjinisë femërore ose nga një prokuror që vjen nga komunitetet joshumicë. Afatet kohore për nominime janë caktuar nga data 25 shtator deri më 9 tetor 2025.
4. Këshilli themeloi Komisionin Zgjedhor për anëtarin e ri të Këshillit në këtë përbërje: z. Arian Gashi (anëtar i KPK-së), kryesues, z. Lulzim Sulejmani (prokuror në Zyrën e Kryeprokurorit të Shtetit), anëtar dhe znj. Ikramije Bojaxhiu (prokurore në Prokurorinë e Apelit), anëtare. Anëtarë rezervë: z. Milot Krasniqi (anëtar i KPK-së), z. Bahri Hyseni (prokuror në Zyrën e Kryeprokurorit të Shtetit) dhe znj. Dëshirë Jusaj (prokurore në Prokurorinë e Apelit)./GJILANI INFO/
