Në kuadër të përpjekjeve të vazhdueshme për rritjen e cilësisë akademike dhe standardizimin e dokumentacionit të brendshëm, në Universitetin Publik “Kadri Zeka”, Gjilan, është mbajtur një trajnim për rishikimin dhe përditësimin e syllabuseve.
Ky aktivitet u organizua si pjesë e zbatimit të Kalendarit për Cilësi të institucionit, duke u konsideruar një hap i rëndësishëm në forcimin e proceseve të brendshme të sigurimit të cilësisë dhe transparencës në mësimdhënie.
Synimi kryesor i këtij trajnimi ishte përmirësimi i përmbajtjes së syllabuseve, standardizimi i tyre sipas praktikave më të mira akademike, si dhe rritja e përputhshmërisë me kërkesat institucionale dhe ndërkombëtare. Përmes këtij procesi, UKZ synon të ofrojë një bazë më të qartë për studentët dhe stafin akademik në raport me objektivat e programeve studimore, rezultatet e të nxënit dhe mënyrat e vlerësimit.
Ligjëruesit e trajnimit ishin Prof. Asoc. Dr. Voglushe Kurteshi, Prof. Ass. Dr. Arbona Xhemajli dhe Prof. Dr. Bashkim Dalipi, të cilët ndanë përvojën dhe njohuritë e tyre profesionale me stafin akademik.
Gjatë trajnimit, u trajtuan një sërë çështjesh të rëndësishme që lidhen me funksionin dhe përmbajtjen e syllabuseve si, roli i syllabuseve në sigurimin e cilësisë së programeve studimore, hartimi dhe vlerësimi i rezultateve të të nxënit në përputhje me standardet akademike, praktikat e vlerësimit dhe koherenca e tyre me politikat institucionale, si dhe u dhanë shembuj praktikë dhe udhëzime për optimizimin e ngarkesës së studentëve dhe llogaritja e saktë e krediteve ECTS.
Në trajnim morën pjesë stafi akademik nga të gjitha njësitë akademike të universitetit, duke u shndërruar në një platformë të hapur për diskutime profesionale, shkëmbim përvojash dhe reflektime mbi praktikat e deritanishme, por edhe në ofrimin e ideve konkrete për avancimin e procesit mësimor.
Ky trajnim është vlerësuar si një organizim i duhur për avancimin e dokumentacionit akademik të universitetit, duke ndihmuar në konsolidimin e standardeve të brendshme, përputhjen me praktikat evropiane dhe përmirësimin e përvojës së studentëve. Në të njëjtën kohë, ai dëshmon përkushtimin e Universitetit Publik “Kadri Zeka” për të ndërtuar një mjedis akademik bashkëkohor, transparent dhe të orientuar drejt cilësisë. /Gjilani Info/
