“Një lajm i mirë dhe inkurajues vjen nga shkolla “Agim Ramadani”, paralelja e ndarë në fshatin Lladovë”, ka bërë me dije, drejtori i Drejtorisë Komunale të Arsimit në Gjilan, Shpend Nuhiu.
Ai thotë se falë një iniciative të përbashkët nga diaspora e këtij fshati, komunitetit lokal dhe donatorëve, objektit shkollor të këtij fshati i nënshtrohet një procesi të gjerë renovimi.
“Ky proces ka dëshmuar një angazhim të lartë institucional dhe qytetar dhe në këyë aspekt Komuna ka kontribuar me fuqi punëtore për kryerjen e disa punëve, ndërsa materialet dhe organizimi janë siguruar tërësisht nga komuniteti”, pohon drejtori Nuhiu.
Sipas tij, kontributet kryesore përfshijnë:
-Donatorët nga Austria, përmes znj. Elduana Emini, e cila ka shërbyer si urë lidhëse me ta;
-Shoqata “Solidariteti” në Gjilan, e cila ka dhënë mjete pune në vlerë prej afërsisht 1000 euro;
-Firma “Benzi” nga Lladova, e cila ka dhuruar banka, karrige dhe një piano.
Drejtoria Komunale e Arsimit ka falënderuar menaxhmentin e shkollës, komunitetin e fshatit dhe mësuesen Bukurije Musliu për përkushtimin dhe kontributin e treguar në këtë proces./GJILANI INFO/
