Është përuruar objekti i rinovuar i shoqatës “Gilan”, investim i Qeverisë së Turqisë.
Në ceremoni ishin ambasadori i Turqisë në Kosovë Sabri Tunç Angili, kryekomandanti i Kryesisë dhe Këshillit Turk në Kosovë, kolonel Harun Elitash, nënkryetari i Komunës së Gjilanit, Kadir Hyseini, drejtori i Arsimit, Shpend Nuhiu, drejtoresha e OJQ-së “Gilan”, Filiz Sllamniku, pjesëtarë të Ushtrisë së Turqisë dhe zyrtarë të tjerë.
Ambasadori i Turqisë në Kosovë, Sabri Tunç Angili, tha se komuniteti turk në Komunën e Gjilanit është shumë i vlefshëm dhe investimet sikur kjo e të tjerat janë shumë të rëndësishme.
“Gjilani është i rëndësishëm për ne, sepse është një urë lidhëse ndërmjet Kosovës dhe Turqisë”, Tunç Angili
Ambasadori tregoi, se shumë shqiptarë nga Gjilani janë në Turqi dhe duhet forcuar bashkëpunimi.
Ai falënderoi edhe forcat e armatosura turke për punën që po bëjnë e po ashtu edhe Komunën e Gjilanit për bashkëpunimin e shkëlqyeshëm.
Kryekomandanti i Kryesisë dhe Këshillit Turk në Kosovë, kolonel Harun Elitash, tha se projekti civilo-ushtarak i kabinetit të rrobaqepësisë është përfunduar nga ana e Kryesisë dhe Këshillit Turk në Kosovë.
Ai shtoi se kjo nuk është vetëm një qendër arsimore, por edhe një simbol i bashkëpunimit vëllazëror ndërmjet Kosovës dhe Turqisë.
Kolonel Elitash, premtoi realizmin e projekteve të reja të cilat do të realizohen në të ardhmen.
“Uroj që ky kabinet t’i sjell të mira qytetarëve”, tha kryekomandanti i Kryesisë dhe Këshillit Turk.
Shpend Nuhiu, drejtori i Arsimit në Komunën e Gjilanit, tha se ky donacion është i rëndësishëm për komunën për mbajtjen e praktikës dhe rritjen e numrit të profesionistëve në Gjilan.
Drejtori i Arsimit, theksoi se janë të gatshëm të ndihmojnë dhe mirëpresin realizmin e projekteve tjera nga populli turk.
Drejtoresha e OJQ-së “Gilan”, Filiz Sllamniku, tha se ky rinovim përbën një ngjarje të rëndësishme për komunitetin tonë falë përkushtimit të qeverisë së Turqisë dhe Komunës së Gjilanit për zhvillim e mbështetje kulturore.
Ajo tha se janë krenar dhe të lumtur që përfundoi një projekt kuptimplotë./GJILANI INFO/
