Nga: Ismet Rashiti
Me dhimbje dhe pikëllim të thellë mora lajmin për ndarjen nga jeta të ish-Kryetarit të Komunës së Vitisë dhe atdhetarit të përkushtuar, Nexhmedin Arifi.
Nexha ishte një burrë i mirë, i vendosur dhe i afërt me të gjithë. Ai spikati si një udhëheqës me vizion, i cili punoi me përkushtim për qytetarët dhe për të ardhmen e vendit tonë.
Pata rastin të punoj me të për tri javë, në periudhën historike kur u shpall Pavarësia e Kosovës. Gjatë atyre ditëve e pashë nga afër vendosmërinë, qetësinë dhe dashurinë e tij për atdheun. Ai ishte gjithmonë i gatshëm të merrte përgjegjësi, të dëgjonte qytetarët dhe të vepronte në interes të përgjithshëm.
Si atdhetar i përkushtuar dhe politikan popullor, Nexhmedin Arifi u angazhua fuqishëm për realizimin e aspiratave të qytetarëve të Kosovës dhe për forcimin e institucioneve demokratike. Ai ishte i afërt me njerëzit e thjeshtë, duke mbetur gjithmonë një shembull i thjeshtësisë dhe i komunikimit të hapur.
Kontributi i tij i çmuar për lirinë, pavarësinë dhe zhvillimin e komunës së Vitisë do të kujtohet përherë me respekt dhe mirënjohje.
Ngushëllimet më të sinqerta familjes së tij, miqve, bashkëpunëtorëve dhe të gjithë atyre që e njohën dhe e çmuan për vlerat që la pas.
Qoftë i përjetshëm kujtimi i tij! /GJILANI INFO/
