Në kuadër të angazhimit për të nxitur barazinë gjinore përmes monitorimit dhe llogaridhënies së ndjeshme ndaj gjinisë, përfaqësues të Komunës së Gjilanit, takuan përfaqësuesit e Iniciativës Rinore për të Drejtat e Njeriut (YIHR), në kuadër të projektit “Monitorimi dhe llogaridhënia me ndjeshmëri gjinore”, i mbështetur nga UN Women, dhe i zbatuar nga Qendra Kosovare për Studime Gjinore (QKSGJ) në partneritet me YIHR, me financim nga Bashkimi Evropian.
Takimi u zhvillua me nënkryetaren e komunës, Leonora Morina Bunjaku, zyrtaren për barazi gjinore, Lindita Salihu, drejtorin e Zhvillimit Ekonomik Enver Shabani, atë të Bujqësisë Bajram Isufi, si dhe zyrtarë të tjerë komunalë.
Gjatë takimit, përfaqësuesit e YIHR prezantuan raportin mbi gjetjet nga monitorimi i Planit Lokal të Veprimit për Barazi Gjinore 2024–2026.
U vlerësua se Komuna e Gjilanit, ka treguar përkushtim të madh dhe ka punuar me sukses në zbatimin e planit, veçanërisht përmes angazhimit të drejtorive të Zhvillimit Ekonomik, Bujqësisë dhe Kulturës, Rinisë e Sportit.
Po ashtu u diskutuan rezultatet e arritura, sfidat e hasura dhe rekomandimet për të përmirësuar edhe më tej angazhimin në këtë fushë të rëndësishme.
Komuna e Gjilanit, do të vazhdojë zbatimin e këtij plani me synimin që të përmbushet plotësisht gjatë periudhës së planifikuar 2024–2026, duke dëshmuar angazhimin e plotë për një shoqëri më të barabartë dhe gjithëpërfshirëse.
Avancimi i barazisë gjinore mbetet një prioritet i komunës./GJILANI INFO/
