Është përmbyllur projekti “Zbatueshmëria e Gjuhëve të Komuniteteve në Institucionet Lokale dhe Qendrore”, nga Asociacioni i Gruas Feminae në mbështetje nga Zyra e Kryeministrit të Kosovës – Zyra e Komisionerit për Gjuhët.
Komuna e Gjilanit, është përgëzuar nga të pranishmit me raste konkrete të mira sa i përket bashkëpunimit dhe avancimit të zbatimit të gjuhëve të komuniteteve dhe për interpretin për gjuhën e shenjave.
Në takimin e mbajtur në Prizren ishte edhe nënkryetarja e Komunës s ë Gjilanit, Leonora Morina Bunjaku, përfaqësues të institucioneve komunale, drejtorëve, zyrtarët e Zyrës së Komisionerit për Gjuhët dhe ekipi monitorues.
Ajo tha se zbatimi i gjuhëve të komuniteteve në institucionet e Komunës së Gjilanit, është i kënaqshëm, pavarësisht vështirësive dhe sfidave në zbatim.
Nënkryetarja e Gjilanit, tregoi se komunitetet kanë edhe përfaqësim adekuatë ku komuna ka edhe nënkryetarin nga komunitetet e po ashtu edhe zyrën e komuniteteve ku janë të përfaqësues të gjithë.
“Komuna e Gjilanit ofron nivel të kënaqshëm të zbatimit të gjuhëve, thuajse të gjitha dokumentet e kërkuara lëshohen sipas kërkesave”, tha Morina Bunjaku.
Sipas saj komunitetet jo shumicë kanë edhe përfaqësuesit e tyre në komunë ku mund të adresohen edhe kërkesat e tyre.
Nënkryetarja e Gjilanit, tregon se pos përkthyesit e gjuhës serbe, kanë në funksion edhe përkthyesin për gjuhën e shenjave.
Ajo thekson të gjitha komunitetet jo shumicë, kanë pasur mundësi që kërkesat e tyre për projekti ti paraqesin edhe gjatë dëgjimeve buxhetore, ku ftesat janë bërë edhe në gjuhët e tyre.
“Komuna e Gjilanit, është e hapur të avancojmë edhe më shumë në zbatimin e gjuhëve të komuniteteve në institucionet lokale ashtu siç edhe kemi qenë gjithnjë kur janë shprehur edhe shqetësime”, tha nënkryetarja Leonora Morina Bunjaku.
Në kuadër të projektit, janë realizuar hulumtime dhe takime me institucionet lokale dhe qendrore, zyrtarët komunalë, si dhe qytetarët, për të vlerësuar nivelin e zbatimit të legjislacionit për gjuhët e komuniteteve në komunat e Prizrenit, Pejës, Gjilanit dhe Mitrovicës.
Diskutimi mes pjesëmarrësve solli në pah nevojën për forcimin e mekanizmave mbikëqyrës, përmirësimin e kapaciteteve institucionale dhe rritjen e ndërgjegjësimit për të drejtat gjuhësore të komuniteteve./GJILANI INFO/
