Komuna e Vitisë, në bashkëpunim me Programin e Kombeve të Bashkuara për Zhvillim (UNDP), po zbaton dy metodologji ndërkombëtare për zhvillimin e ndërmarrjeve të vogla dhe të mesme, “Grow Your Business (GYB)” dhe “In Motion”. Bëhet me dije se ky program ka si qëllim përmirësimin e menaxhimit dhe operacioneve të bizneseve lokale, duke ofruar qasje të personalizuar dhe konsulencë të drejtpërdrejtë.
Në kuadër të këtij projekti, deri tani janë përfshirë 20 biznese lokale nga sektorë të ndryshëm. Këto biznese kanë përfituar ndihmë në modernizimin e pajisjeve, përmirësimin e imazhit tregtar dhe trajnime praktike, duke sjellë rezultate konkrete dhe të matshme për komunitetin e biznesit.
Rezultatet e programit “In Motion” në Viti:
- 12 biznese të përzgjedhura nga sektorë të ndryshëm si bukëpjekje, rrobaqepësi, sallone bukurie, tregti, shërbime dhe prodhim artizanal.
- Rritje mesatare prej 36% të fitimeve mujore pas ndërhyrjes.
- Shitje shtesë mujore për të gjitha bizneset: mbi 16,900 euro.
- 110 orë asistencë teknike të personalizuar, duke përfshirë trajnime në financa, marketing dhe organizim pune.
- Modernizim i hapësirave dhe regjistrim në platforma dixhitale si Google Maps.
- Përmirësim i branding-ut dhe strukturës organizative të bizneseve.
Rezultatet e programit “Grow Your Business” (GYB):
- 8 biznese pjesëmarrëse kanë përfituar 536 orë asistencë teknike dhe trajnime intensive.
- Rritje prej 25% në shitje dhe 36% përmirësim në praktikat e mira prodhuese (GMP).
- 17 produkte të reja janë zhvilluar gjatë procesit.
- 43 punëtorë janë trajnuar në menaxhim, marketing dhe kujdes ndaj klientit.
- Bizneset kanë marrë pjesë në 11 panaire vendore dhe ndërkombëtare, duke siguruar marrëveshje me kompani zvicerane dhe kontrata eksporti.
Shembuj konkretë suksesi:
- Bio Ferma Bardhi ka rritur fitimin me 25% pas përmirësimit të pajisjeve dhe paketimit.
- Te Lisi ka rritur shitjet me 11.5% dhe ka dyfishuar bashkëpunimet B2B.
- Mycelium Farm ka rritur kapacitetin e prodhimit me 30% dhe ka arritur marrëveshje të reja shpërndarëse.
- Grasep SHPK ka siguruar marrëveshje eksporti në tregun evropian, duke synuar një rritje të shitjeve me 30%.
- OP Farm Stublla ka hapur pika të reja shitjeje dhe ka rritur kapacitetin me 233%.
Ky program është një shembull i shkëlqyer i bashkëpunimit ndërmjet qeverisjes lokale dhe partnerëve zhvillimorë në mbështetje të forcimit të ekonomisë vendore. Komuna e Vitisë do të vazhdojë të mbështesë dhe fuqizojë ndërmarrjet lokale, duke besuar se zhvillimi ekonomik i qëndrueshëm mund të arrihet vetëm përmes mbështetjes direkte dhe fuqizimit të sipërmarrësve./GJILANI INFO/
