Kanë nisur aktivitetet për shënimin e 8 marsit- Ditës së Gruas, organizuar nga Komuna e Gjilanit, ku janë ndarë edhe mirënjohje për 23 gra të cilat kanë lënë dhe po lënë gjurmë në zhvillimin e Komunës së Gjilanit. Nga këto mirënjohje 3 janë post mortem.
E pranishme ishte edhe zv.ministrja e Jashtme Liza Gashi, deputeetja Shqipe Selimi e gra nga institucinet tjera.
Nënkryetarja e Komunës së Gjilanit Leonora Morina Bunjaku, tha se sot, më shumë se një ditë simbolike, është një moment reflektimi, falënderimi dhe fuqizimi.
“Jemi këtu për të nderuar gratë që kanë lënë gjurmë të pashlyeshme në komunën tonë dhe për të frymëzuar ato që çdo ditë vazhdojnë të kontribuojnë me punën, përkushtimin, devotshmërinë, guximin dhe sakrificat e tyre”, tha Morina Bunjaku.
Nënkryetarja, shtoi se historia është dëshmitare se gratë kanë qenë dhe janë shtylla e çdo shoqërie, pavarësisht sfidave dhe pengesave. Nga gratë që kanë ndërtuar familje të forta, te ato që kanë luftuar për të drejtat tona, te ato që sot mbajnë mbi supe përgjegjësi të mëdha në politikë, ekonomi, arsim, shëndetësi, inovacion, kulturë dhe çdo fushë tjetër – të gjitha ju jeni heroina të vërteta.
Ajo tregoi edhe thënien e Michelle Obama: “Asnjë vend nuk mund të arrijë potencialin e tij të plotë nëse e lë pas gjysmën e popullsisë së tij”.
“Sot, le të kujtojmë se fuqia e një shoqërie matet me fuqizimin e grave të saj. Ne, gratë e Gjilanit, kemi treguar se nuk ka sfidë që nuk mund të kapërcejmë. E kemi dëshmuar se kur kemi mundësi të barabarta, ne shkëlqejmë. Ne jemi edukatore, mjeke, artiste, udhëheqëse, sipërmarrëse dhe mbi të gjitha, jemi forcë transformuese për komunitetin tonë. Sot dua të nderoj edhe ato gra që nuk janë më me ne, por që lanë trashëgimi të vyer”, tha Morina Bunjaku.
Më tej nënkryetarja, falënderoi gratë që sot punojnë për një Gjilan më të mirë, për një shoqëri më të drejtë dhe më të barabartë.
Siç ka thënë një nga gratë më të fuqishme të historisë, Eleanor Roosevelt: “E ardhmja u përket atyre që besojnë në bukurinë e ëndrrave të tyre”.
“Prandaj, le të vazhdojmë të ëndërrojmë, të punojmë dhe të mos ndalemi asnjëherë, sepse bota ka nevojë për fuqinë tonë, për zërin tonë dhe për guximin tonë. Gëzuar 8 Marsin! Le të vazhdojmë të jemi frymëzim për njëra-tjetrën dhe për gjeneratat që vijnë”, tha nënkryetarja Morina Bunjaku.
Kryetari i Komunës, Alban Hyseni, tha se është mirënjohës për gratë që kanë dhënē kontribut në të gjitha fushat e jetës në zhvillimin e shoqërisë tonë dhe vazhdoni të jepni ende kontributë për gjeneratat e reja.
“8 marsi është një ditë e veçantë që simbolizon përpjekjen dhe luftën për drejtësi e barazi. Në Kosovë besoj se tani jemi duke luftuar për vazhdimësinë e sukseve të grave e jo për drejtësi e barazi”, tha Hyseni.
I pari i Gjilanit, theksoi se simboli Heroina që është vendosur në qendër përfaqëson të gjitha nënat shqiptare.
Lindita Salihu zyrtare për barazi gjinore në Komunën e Gjilanit, tha se është nder i veçantë të qëndroj në mesin e grave që kanë lënë gjurmë në çdo fushë të jetës – aktiviste që nuk u ndalën kurrë në kërkimin e drejtësisë, luftëtare që mbrojtën lirinë me sakrificë, artiste që frymëzuan breza të tërë, politikane që hapën dyer për gratë në vendimmarrje, mësuese dhe profesoresha që formësuan mendjet dhe zemrat e kombit, edukatore që me duart e tyre të buta ndërtuan themelet e brezave të rinj.
“Falë përkushtimit dhe sakrificës suaj, ne sot po ecim rrugës që ju e trasuat me mund, guxim dhe vizion për një të ardhme më të barabartë”, tha Salihu.
Më tej ajo shtoi, se na bën krenar fakti që kanë përkrahjen e udhëheqjes së komunës për ta vendosur barazinë gjinore në qendër të agjendës sonë. Kur fuqizohen gratë, fuqizojmë familjet, komunitetin dhe shoqërinë mbarë.
“Sot nuk festojmë vetëm 8 marsin. Festojmë forcën, guximin dhe vizionin e grave të komunës dhe vendit, të gjitha juve që jeni këtu dhe atyre që vazhdojnë të ndërtojnë të ardhmen”, tha Lindita Salihu.
Po ashtu është publikuar edhe broshura “Fuqizimi i gruas, forcë për ndryshim” ku dhe janë dhuruar edhe lule./GJILANI INFO/
