Në shënimin e 12 vjetorit të themelimit të Universiteti Publik “Kadri Zeka” në Gjilan, ka marr pjesë edhe kryetari i Komunës së Gjilanit. Alban Hyseni.
Ai tha se 6 marsi është një ditë e veçantë jo vetëm për Epopenë e UÇK-së, por edhe për shënimin e këtij përvjetori.
Sipas tij ky përvjetor shënon 12 vjet përpjekje, rritje e arritje në shërbim të dijes për komunitetin e regjionin tonë.
“Është një moment krenarie besoj për të gjithë ne, teksa kujtojmë rrugëtimin nga fillimet e thjeshta deri te një institucion arsimor të respektuar që është arritur sot”, tha kryetari Alban Hyseni.
I pari i Gjilanit shtoi se ky përvjetor medoemos na sjell në mendje edhe dashurinë e Kadri Zekës, për dije dhe veçanërisht për liri. E kur dija e liria janë bashkë atëherë edhe rezultatet janë kulmore e të pandashme.
“Dija për 12 vjet ishte drita që ka ndriçuar rrugën tonë përmes Universitetit Kadri Zeka. Teksa shënojmë këtë përvjetor ne festojmë suksesin e UKZ-së bashkërisht”, tha Hyseni.
Sipas tij ky sukses matet jo vetëm me vitet e ekzistencës së tij, por me ndikimin që ka pasur në shoqërinë tonë ku mijëra të diplomuar kanë dalë nga këtu.
Kryetari i komunës, shtoi se si institucione lokale kanë realizuar projekte të përbashkëta në interes të qytetarëve.
Ai theksoi se ka përpjekje të vazhdueshme për gjetjen të hapësirave të përshtatshme për UKZ-në dhe të arrihet një zgjidhje. Dhe tashmë janë dy lokacione për UKZ-në të cilat nesër do të votohen në Kuvendin Komunal.
“Kjo është përpjekje e pandalshme tash e 12 vjet e cila rastis të kulmoi nesër. 12 vjetët e universitetit janë vetëm fillimi, historia e UKZ-së po vazhdon të shkruhet. Sukseset do të jenë edhe më të mëdha në të ardhmen ashtu siç do të jetë edhe krenaria”, tha kryetari Hyseni./GJILANI INFO/
