Kreu i Komunës së Gjilanit, Alban Hyseni thekson se opozita nuk ka marrë pjesë në asnjë dëgjim buxhetor, si dhe nuk ka dërguar asnjë propozim të vetëm.
“Më pas, ne e kemi dërguar buxhetin drejtuar Kuvendit komunal, por deri më tani, pra në javën e fundit të afatit ligjor, nuk është aprovuar buxheti i komunës”, thotë Kryetari Hyseni.
E, sipas tij, tani, kur ditët janë të numëruar, është tepër vonë dhe jashtë çdo afati ligjor për dëgjime buxhetore, apo procedura tjera.
“Më datën 25 shkurt, pra vetëm tri ditë para përfundimit të afatit ligjor, do të thërrasin një seancë tjetër urgjente për aprovimin e buxhetit”, ka thënë Kryetari Hyseni.
Ai iu ka bërë thirrje partive politike dhe të gjithë asambleistëve të Kuvendit Komunal në Gjilan, që të votojnë për dhe që ta aprovojnë buxhetin e qytetarëve të Gjilanit./GJILANI INFO/
