Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, ka nënshkruar dy marrëveshje bashkëpunimi me Bankën Raiffeisen dhe Raiffeisen Tech Kosova. Ky partneritet ka për qëllim forcimin e lidhjeve mes arsimit të lartë dhe industrisë bankare dhe do të ofrojë mundësi për zhvillimin e trajnimeve, seminareve dhe mundësive për praktika për studentët e Universitetit të Gjilanit.
Gjithashtu nënshkrimi i marrëveshjes tjetër me Raiffeisen Tech Kosova ka për qëllim avancimin e aftësive profesionale të studentëve dhe ofrimin e mundësive të karrierës për të rinjtë kosovarë, duke i kyçur ata në projekte të ndryshme zhvillimore nga të cilat do të kenë edhe mundësi për bursa e po ashtu edhe për pagesa mujore të rregullta. Pjesëmarrësit në ceremoninë e nënshkrimit theksuan rëndësinë e këtij bashkëpunimi për të siguruar një përgatitje më të mirë të studentëve për tregun e punës dhe për të kontribuar në forcimin e sektorëve të ndryshëm të ekonomisë kosovare.
Rektori Prof. Asoc. Dr. Artan Dërmaku në lidhje me këtë marrëveshje bashkëpunimi tha se ky bashkëpunim me Bankën Raiffeisen është një mundësi e shkëlqyer për studentët tanë, duke u ofruar atyre mundësi praktike dhe profesionale që do t’i ndihmojnë të zhvillojnë aftësitë e tyre dhe të jenë më të gatshëm për të përballuar kërkesat e tregut të punës. “Si Universitet, angazhohemi për të ofruar arsim cilësor dhe mundësi të vazhdueshme zhvillimi për studentët tanë, dhe ky partneritet është një hap i rëndësishëm drejt arritjes së këtyre objektivave,” ka thënë Rektori Dërmaku.
Ky hap i rëndësishëm do të mbështesë zhvillimin e shpejtë të shkathtësive profesionale dhe njohurive në fushën bankare, si dhe do të krijojë mundësi të reja për të rinjtë në Kosovë. /GJILANI INFO/
