Universiteti Publik “Kadri Zeka” ka realizuar një arritje të rëndësishme për studentët e tij, përmes një marrëveshjeje bashkëpunimi me Future Minds Academy. Marrëveshja u nënshkrua në nëntor të vitit 2024 nga rektori i UKZ-së, Prof. Asoc. Dr. Artan Dëramku, dhe udhëheqësi i FMA-së, Ridvan Aliu.
Në kuadër të kësaj marrëveshjeje, janë përzgjedhur pesë studentët më të dalluar nga një grup prej 166 aplikantësh që iu përgjigjën thirrjes për bursa. Fituesit e përzgjedhur do të përfitojnë bursa të plota të financuara nga Future Minds Academy Foundation për të ndjekur trajnime profesionale.
Fituesit e bursës, pesë studentët e përzgjedhur janë: Rigesa Jashari, Dion Bejtullahu, Lejla Keqmezi, Leorent Ismajli dhe Elion Ahmeti.
Ky bashkëpunim sjell një sërë përfitimesh të rëndësishme për studentët e UKZ-së, duke përfshirë bursa dhe trajnime profesionale në IT, ku studentët do të zhvillojnë aftësi të avancuara në teknologjinë e informacionit, duke u përgatitur për tregun global të punës.
Po ashtu përfituesit do të kenë qasje në mundësi punësimi në tregun amerikan dhe atë kosovar, përmes lidhjeve me kompani prestigjioze.
Trajnimet e financuara nga Future Minds Academy janë një investim në të ardhmen e këtyre studentëve, duke i pajisur ata me njohuri dhe aftësi që janë shumë të kërkuara në tregun modern të punës. Kjo nismë është një dëshmi e angazhimit të UKZ-së dhe Future Minds Academy për të ndihmuar studentët në arritjen e potencialit të tyre maksimal./GJILANI INFO/
