Ka filluar manifestimi mbarëkombëtar, “Flaka e Janarit”, organizuar nga Komuna e Gjilanit.
Kryetari i Gjilanit Alban Hyseni, bashkë me ministrin e Mbrojtjes Ejup Maqedoncin, ministren e Drejtësisë Albulena Haxhiun, zv. ministrin e Mbrojtjes Shemsi Sylën, nënkryetaren Leonora Morina Bunjakun, deputetë, ministra, drejtorë, aktivistë dhe qytetarë, gjatë ditës bënë homazhe tek varrezat e dëshmorëve në Gjilan.
Më pas aktivitetet kanë vazhduar në Kazermën e Qytetit, ku janë prit nga komandanti i FSK-së i kësaj kazerme nënkoloneli Arben Avdyli.
Kryetari i Komunës së Gjilanit, Alban Hyseni, tha se së bashku me nënën Stane, deputetë, ministra, aktivistë dhe qytetarë, nderuan historinë dhe të ardhmen e Kosovës.
“Flaka e Janarit”, ka filluar që nga dita e sotme, duke na kujtuar heronjtë dhe dëshmorët që dhanë gjithçka për lirinë tonë. Vizituam Kodrën e Dëshmorëve, ku mes varreve të heronjve reflektuam mbi sakrificat e tyre dhe ripërtëritëm angazhimin për një Kosovë që respekton dhe vlerëson ato sakrifica”, tha Alban Hyseni.
I pari i Gjilanit, theksoi se më pas, vizituan ushtarët e FSK-së, të cilët me guxim dhe përkushtim mbrojnë sigurinë dhe sovranitetin e vendit tonë.
“Flaka e Janarit”, na kujton sakrificat që na sollën lirinë dhe angazhimin për të ndërtuar një të ardhme të sigurt”, tha kryetari Alban Hyseni./GJILANI INFO/
