Senati i Universitetit Publik “Kadri Zeka” në Gjilan, në mbledhjen e tij të mbajtur më 30 dhjetor 2024, ka mirartuar propozimin e Këshillit të Bizneseve të Rajonit të Gjilanit për dhënien e titullit të nderit “Doctor Honoris Causa” ish-presidentit të Shteteve të Bashkuara të Amerikës, George W. Bush.
Propozimi për dhënien e këtij titulli erdhi nga z. Arsim Vranovci, Kryetar i Bordit Këshillëdhënës të Universitetit dhe President i Këshillit të Bizneseve të Rajonit të Gjilanit, derisa nga Senati u miratua me motivacion të lartë për njohjen e kontributit të jashtëzakonshëm të ish-presidentit Bush në mbështetje të Kosovës.
Fillimisht Rektori i Universitetit Publik “Kadri Zeka”, Prof. Asoc. Dr. Artan Dërmaku, ka zhvilluar një takim me Kryetarin e Bordit Këshillëdhënës (Industrial) të Universitetit, njëherësh President i Këshillit të Bizneseve të Rajonit të Gjilanit, z. Arsim Vranovci dhe ekipin e tij. Gjatë këtij takimi, z. Vranovci ka dorëzuar zyrtarisht një kërkesë për Senatin e Universitetit për dhënien e titullit “Doctor Honoris Causa” për ish-presidentin e Shteteve të Bashkuara të Amerikës, George W. Bush, të cilën kërkesë Rektori Dërmaku e ka paraqitur në Senat, e cila u votua unanimisht nga anëtarët e Senatit të UKZ-së.
Rektori Prof. Asoc. Dr. Artan Dërmaku vlerësoi këtë akt si një nderë të veçantë për një personalitet të shquar që ka dhënë një kontribut të jashtëzakonshëm për Kosovën dhe promovimin e vlerave të saj ndërkombëtare. Rektori tha se UKZ ka privilegjin dhe përgjegjësinë që të njohë dhe të vlerësojë personalitete të shquara që kanë ndikuar në mënyrë të veçantë në historinë dhe të ardhmen e Kosovës. “ Propozimi për dhënien e titullit ‘Doctor Honoris Causa’ për ish-presidentin George W. Bush përfaqëson një njohje të thellë për mbështetjen e tij të pakushtëzuar për popullin tonë dhe për rolin e tij të jashtëzakonshëm në konsolidimin e paqes dhe demokracisë në rajonin tonë”, ka thënë Rektori Dërmaku. Rektori ndër tjerash në fjalën e tij ka theksuar se: ”Ky titull nuk është vetëm një akt simbolik, por edhe një shprehje e mirënjohjes sonë për një lider global që ka përfaqësuar vlerat e drejtësisë dhe lirisë, duke qëndruar gjithmonë krah Kosovës në momentet më të rëndësishme të historisë sonë”.
Kurse z. Arsim Vranovci Kryetar i Bordit Këshillëdhënës (Industrial) të Universitetit, njëherësh President i Këshillit të Bizneseve të Rajonit të Gjilanit tha se propozimi për ndarjen e titullit “Doctor Honoris Causa” nga Universiteti Publik “Kadri Zeka” për ish-Presidentin e 43-të të Shteteve të Bashkuara të Amerikës, George W. Bush, është shumë i rëndësishëm për rolin e tij vendimtar në mbështetjen e pavarësisë dhe njohjes ndërkombëtare të Kosovës.
Ai tha se rajoni i Gjilanit, si sektor tradicional nën kujdesin amerikan në kuadër të KFOR-it, ka lidhje të veçanta me Shtetet e Bashkuara, sepse Presidenti Bush ishte një nga liderët kyç që mbështeti pa mëdyshje pavarësinë e Kosovës, duke deklaruar publikisht: “Kosova është e pavarur!” dhe se ndikoi në ndërhyrjen vendimtare të NATO-s në vitin 1999, si dhe në njohjen e pavarësisë së Kosovës në vitin 2008. “Ndarja e këtij titulli do të nderonte rolin e jashtëzakonshëm të Presidentit Bush në mbështetjen e kauzës kombëtare shqiptare dhe do të afirmonte Universitetin Publik “Kadri Zeka” në arenën ndërkombëtare”, ka thënë z. Vranovci në fjalën e tij.
Me këtë akt Këshilli i Bizneseve në Rajonin e Gjilanit do të fillojë proceduart e ndarjes së titullit “Doctor Honoris Causa” për ish-presidentin George W. Bush që pritet të mbahet në një ngjarje solemne gjatë vitit të ardhshëm. Kjo ngjarje do të shënojë një moment historik për Universitetin dhe do të forcojë lidhjet e Kosovës me partnerët ndërkombëtarë./GJILANI INFO/
