Është vënë gurthemeli i qëndrimit ditor për të moshuarit, bujtinën për studentë dhe kuzhinën humanitare në Gjilan.
Ky projekt i rëndësishëm financohet nga Komuna e Gjilanit dhe shoqata “Jetimat e Ballkanit”, në vlerë mbi 2.5 milionë euro.
Kryetari i Komunës së Gjilanit, tha se me humanistin Halil Kastrati vendosën gurthemelin e qëndrimit ditor për të moshuarit, kuzhinës popullore dhe bujtinës për studentë.
“Së bashku po ndërtojmë mekanizma efikase për kujdes ndaj atyre që kanë nevojë për ne”, tha Alban Hyseni.
Humanisti Halil Kastrati, nga shoqata “Jetimat e Ballkanit”, tha se bashkë me kryetarin e Komunës së Gjilanit, vendosën gurthemelin e një projekti të rëndësishëm, realizuar në bashkëpunim mes Shoqatës sonë “Jetimat e Ballkanit” dhe Komunës së Gjilanit.
Ai tregon se projekti përfshin: qendër ditore për të moshuar, bujtinë për student dhe kuzhinë humanitare.
“Ky kompleks do të ofrojë: shërbime për 100 të moshuar, 200 shujta ditore për familjet në nevojë dhe strehim për 30 studentë që do të kenë mundësinë të banojnë aty”, tha Halil Kastrati./GJILANI INFO/
