Duke iu referuar fillimit të vitit të ri shkollor, e që nisë me të hënën e javës së ardhshme, me 2 shtator, kryetari I komunës së Vitisë, Sokol Haliti, ka thënë: “Me kënaqësi ju informoj se të gjitha shkollat në komunën tonë janë të gatshme për fillimin e vitit të ri shkollor 2024-2025. Ne kemi përfunduar të gjitha përgatitjet e nevojshme për të siguruar që çdo nxënës të ketë një mjedis të sigurt, të pastër dhe të përshtatshëm për mësim dhe zhvillim të aktiviteteve shkollore”.
Sipas kryetarit Haliti, gjatë muajve të kaluar, ka patur investime për përmirësimin e infrastrukturës shkollore, përfshirë renovimin e klasave, kushteve sanitare dhe krijimin e hapësirave të reja dhe atyre ekzistuese.
Po ashtu, është siguruar që shkollat të pajisen me materialet e nevojshme didaktike dhe teknologjike për të përmbushur kërkesat e mësimdhënies moderne.
“Jam krenar që së bashku me ekipin tim, kemi mundur të krijojmë një ambient arsimor që përkrah zhvillimin e nxënësve tanë dhe ndihmon në arritjen e suksesit të tyre akademik”, ka thënë ai, duke uruar dhe dëshiruar për të gjithë nxënësit e kësaj komuneje, një vit të suksesshëm./GJILANI INFO/
