“Në përditësimin e fundit të ranglistës së njohur botërore “Webometrics”, Universiteti Publik “Kadri Zeka” në Gjilan shënon një rritje të shkëlqyeshme duke u ngritur për 4,301 vende më lart krahasuar me vitin e kaluar. Ky përparim vërehet në të dy aspektet e rangimit, si atë të përgjithshëm, ashtu edhe në atë të metrikave të bazuar në kërkim shkencor, inovacion dhe ndikimin në shoqëri”, thuhet në komunikatë.
Ky sukses i ngritjes së rangimit të UKZ-së në Webometrics, i atribuohet para se gjithash punës së stafit akademik, si dhe punës së palodhshme të menaxhmentit të ri në krye me rektorin Prof. Asoc. Dr. Artan Dërmaku, të cilët janë duke i përmirësuar kushtet dhe infrastrukturën për rritjen edhe më të madhe të pozicionin në rangimin e UKZ-së në Webometic.
Megjithatë edhe pse ka arritur një sukses të shkëlqyeshëm, UKZ ende synon përmirësime duke shfrytëzuar potencialet e tjera të vlefshme. Në krahasim me institucionet e tjera të rajonit, ende ka sfida për të cilat universiteti është duke punuar me seriozitet. Menaxhmenti dhe stafi janë angazhuar në identifikimin e mangësive dhe po ndërmarrin nisma strategjike për të avancuar pozicionin në këtë platformë prestigjioze.
UKZ ka dëshmuar performancë të jashtëzakonshme me numrin e publikimeve shkencore në platformat e njohura si Scopus dhe Google Scholar. Rritja është reflektim i përpjekjeve të vazhdueshme dhe kontributit të stafit akademik në fushën e kërkimit shkencor.
Suksesi i Universitetit Publik “Kadri Zeka” në Gjilan në këtë rangim tregon një përparim dhe një përkushtim të vazhdueshëm për standarde të larta në arsimin e lartë në Kosovë.
Ndryshe Webometrics vlerëson rreth 30 mijë universitete nga e gjithë bota dhe konsiderohet si një ndër ranglistat më të rëndësishme për arsimin e lartë, thuhet në komunikatë.. /GJILANI INFO/
