Në prag të 110-vjetorit të shpalljes së Pavarësisë së Shqipërisë, në Gjilan është vendosur sot gurthemeli i shtatores së heroit të Kuvendit të Kosovës në Prizren më 1945, deputetit të popullit shqiptar, tribunit të kombit, Ramiz Cërnica, e cila është organizuar nën përkujdesjen e kryetarit të Komunës, Alban Hyseni, e ku pos familjes së heroit, kanë marrë pjesë edhe personalitete nga niveli lokal e qendror dhe nga Maqedonia e Veriut.
Kryetari Hyseni tha me këtë rast se ndihet i privilegjuar që si pushtet lokal dhe qeverisje e re, në cilësinë e kryetarit të Komunës, të vendosë gurthemelin e njërit prej figurave më të mëdha të historisë së popullit shqiptar.
Përfaqësuesi i Këshillit organizativ, Ismet Sylejmani, tha se janë sot të gjithë bashkë për të nderuar një gjigant për qëndrimin e tij madhor me dinjitet të lartë kombëtar e me guxim epik të pashembullt.
Deputeti i Parlamentit të Maqedonisë së Veriut, Ali Ahmeti, ka thënë se në këtë ngjarje ka dy gëzime.
“Gëzimin e parë e kam sepse gëzohet Rexhep Mala e Nuhi Berisha për vendosjen e këtij tribuni këtu, ndërkaq gëzimi i dytë është rinia, djalëria nuk e harron historinë, por ngrit shtatore të derdhur në bronz për Ramiz Cernicën. Të lumtë Alban, sepse një nga shqetësimet që ma paraqesin njerëzit është se ‘a thua gjeneratat që do të vinë pas do të jenë vlerësues të të gjithë atyre sakrificave që ka pasur kombi ynë’. Kjo është vepra më kapitale që një djalë i ri, kryetar i Komunës, nuk e harron të kaluarën sepse di ta ndërtojë të ardhmen”, ka thënë Ahmeti.
Në emër të Qeverisë së Kosovës dhe Ministrisë së zëvendësministri i Mbrojtjes, Shemsi Syla, i cili tha se kjo ngjarje është madhështore jo vetëm për Gjilanin, Karadakun e Gollakun, por për të gjitha trojet shqiptare.
“Ramiz Cernicën, përveç që e patëm në qenien tonë shpirtërore, të veprimtarisë madhështore patriotike, sakrificës e heroizmit unikal si dhe idealin e lirisë, sot atë po e rikthejmë në mesin tonë edhe të skalitur në bronz, me shtatoren madhështore”, është shprehur zëvendësministri Syla.
Në emër të familjes së heroit Ramiz Cernica, ka folur djali i tij, Abdyl Hoxha, i cili ka falënderuar strukturat komunale për përkrahjen për vendosjen e kësaj shtatore. /GJILANI INFO/
