Ahmet Selmani
(ose duke pritur këngën e pakënduar)
Ynëzot
na e fal mëkatin
vetë i kemi rritur zogjtë e Stimfalit
që tani na e hanë mishin e regjur
në rrezg të ditës
dhe eshtrat na i lënë në diell
si statuja të gjalla
që thahen
e s’bëzajnë
ndërkaq ne
flasim prajshëm
kacagjelohemi për qiellin e lirë
duke pritur të fluturojnë bukur
njata zogj me sy kafshues
e t’ia marrin këngës
së pakënduar.
