Shefi i Repartit, Pediatri Specialist, Dr. Sadik Rashti, për Agjencinë e Lajmeve “ Gjilani Info” thotë se këto kushte ofrojnë komoditet për shërbimet profesionale shëndetësore që ofrohen prej 6 mjekëve pediatër specialistë dhe 15 infermiereve të cilat punojnë me ndërrime.
“Shërbimet shëndetësore që ofrohen në Repartin e Pediatisë në Gjilan janë të përgjithëshme, kurse gama e shërbimeve profesionale është kryesisht e karakterit të trajtimeve spitalore të rasteve patologjike për të cilat prindërit e fëmijëve janë të kënaqur me shërbimet tona”, ka thënë Shefi i Repartit, Dr.Rashiti.
Tutje ai tha se reparti ka 7 dhoma me 27 shtretër si dhe dhomen e kujdesit intensiv, në të cilën monitorohen rastet e rënda, varësisht nga specifika e sëmundjes, e që sipas tij, janë të mjaftueshme për Rajonin e Gjilanit për sa i përket trajtimeve spitalore pediatrike të fëmijëve.
Ndërkaq, bëhet e ditur se reparti ka edhe dhomën e lodrave për fëmijë, porse kihet nevoja për një ambient më të përshtatshëm për rregullimin e një kopshti lojrash të fëmijëve në oborrin e spitalit.
Rashiti vlerëson se trajtimi në aspektin e përgjithshëm është kryesisht në nivel të duhur dhe ofron shërbime profesionale, varësisht nga sëmundjet që paraqiten tek fëmijët, si: gjendjet gripoze, infeksioneve respiratore, viroza të ndryshme të cilat shkaktojnë gastro-enteride, konversionet fibrile, e sëmundje të tjera që kërkojnë trajtim spitalor, ku edhe nuk mungonë as kujdesi inter- infermior.
“ Në repart monitorohen edhe fëmijët që shpesh vijnë në gjendje të rendë me satorim të ulët, e jo rrallë edhe pa vetëdije”, thotë ai.
Nga ana tjetër, thuhet se egziston nevoja për profilizimin e kuadrove, e që mbetet për një periudhë të afërtë, që të fillohet me trajnimin e kuadrove të reja të cilët pritet të vijnë në këtë repart.
I pyetur për synimin që kihet për këtë repart u tha se synimi profesional mbetet gjithmonë përkushtimi i vazhdueshëm në ngritje të cilësisë për të ofruar një gamë më të gjërë shërbimesh.
Por, është vënë në pah edhe nevoja e freskimit me kuadro prej të rinjëve të specializuar, natyrisht edhe edukim i vazhdueshëm profesional./GJILANI INFO/
